Thursday, December 18, 2008

Brrrrrr it is freezing - اجمووود صقع جليد مش من يالا











بدت تبااان - من زمان وانت اتعيط واتنق تبي تشوف التلج - تحساب روحك تحب التلج - غير رايك - غيره بلكل - مش معقوووولة - تصبح الصبح يدوب تفك العظام من بعضهن وتحرك الدورة الدموية شبه الواقفة - تطلع يسبقك ضباب نفسك مسافة - تبحت من الروشن ماتشوف شي من التلج اللي عليه - وشنو؟ - هضا شي قالوا حذا التلج المزبوط!! - يا باتي ويا امي !! - تمشي للمطبخ تتقفقف وسنونك يطقطقن علي بان ماتدفا - بيش تقدر تحط البكرج عالنار وانت ملصق ضهرك ف الدفاية - تحاول انك ماتفكرش في جنانك - القراريش والزهور والنباتات المجمدات - وزعمك شن صار ف الغزلان والطيور الزرق والطير الابيض الكبير اللي مش عارف اسمه ؟ - وشنو صار ف البط والسناجيب طبعا مش حتقول شنو صار ف الناس - وانت مبارح رقدت مغموم من الاخبار اللي تقول سم تجرع فيه طول النهار - قتل - حوادث - جدل حول احذية اطير - يبين حال العالم اللي تقطع فيه الكراهية والعنجهية والصلف والذل والا حتلال - طفل مخطوف من عام 81 كانوا لقوا راسه مقطوع بعد اسبوعين منها -و هله طلعوا ف التلفزيون بعد هالسنين دموعهم نااار يقولوا خلاص نسكروا القضية - بعد ملوا يعرفوا ليش؟- ناس ماتوا من الصقع - كهربا مقطوعة في جو مصقع عالاخر - سياسات معجنة معفطة ملبزة - عالم ماشي شمال خاش يمين مجتاز الاحمر -عالم علي حافة - عااالم مجنون - مفيش حاجة تفرح - تخلي الدم يجري ف العروق! - يدوب تشرب القهوة يدوب تمد كرعيك خايف تبحت زين برة - تقلق فيك قولة "مازلت ماشفت شي من الصقع "- تقلق فيك واجد علي اثر ما انت قالق من حاجات مش عارف شنو - قالوا من تاثير الجو - يقلق- بس انت متعود عالقلق اللي من اصله - عالقلق اللي فاق القلق بمراحل - زعمك شنو الفرق بين الجمود والعجاج - ف بنغازي عجاج حمر غبر - فيها صعوبة ف التنفس - فيها مكانس بادن - في بنغازي قج امية وتوبوات وتسييق ليه ليه - فيها آزما واختناق - اللي عندهم حساسية زعم شن دايرين - وهو مالك ! - زعمك هم عرب العجاج الحمر سيدي المهدي رقم 2 يفكرو امغير فيك وشن داير !- بس لا - في غادي حاج غالي عالقلب - طول الوقت نابت ف التلفزيون يتبع ف اخبار الطقس هنا واخبار الزلزال والحرايق وديما يده عالنقال وديما عالخط ينشد عليك - ربي يطول في عمره ويزيده صحة - وفي حويجة حتى هي تقول زعمك شن داير هاني واللاحاير - شن اخبار جنانه ! - تقرب من باب البكونة خايف تبحت زين - خايف من الطاقية ياعرب اوريغن ف الشمال فوق- ياللي حابسكم التلج لا طلوع لاخشوش - لاشغل لامدارس - حتى عرب ليبيا قالوا عطلوا المدارس من العجاجات المعججات - هو ناقصهم! - تحل الباب اللي ما قريب ينحل - تلقى الشجر شايب - مش من التلج - التلج مازال مانزل - من الصقع - من درجة الحرارة اللي اكيدة كانت تحت الصفر امبارح - تشوف قريريشاتك - ياناري - طوبة تلجة حتى وهنا مغطيات - قالوا يديروا في دفايات هنا للجنانات والمزارع !- تفكر تخششهن جوا - بس وينّ ؟- تفكر تتخلى عنهن - او تدخلهن مأوي نباتات لعند الربيع - عليك عالم - عليك افكار - بس الرحمة والحن يشيلنك بعيد بعيد - الحن هنا كبير بس بفلوس طبعا - حن مدفوع الاجر - تضحك - مش لك ايام تضحك وخاطرك في دلاية معينة تحطها في سلسلتك - طنبورية فيها خاصية الطيران المفاجئ- تزيد تضحك - وتفكر توقع معاهم - تفكر ف المسكين - وفي لحظة الغل اللي خلاته حفيان مدشدش مكسر حوض ويدين - تفكر ف العالم وين ماشي - وفي نكتة جحا اللي حتى بعد روح لبلاده بعد عشرين سنة لقاهم مازالوا متفكرين عملته ف الجامع - تزيد تضحك - لأن هنا الصحافة والتلفزيون ماعقبوا مادارو - حفظنا تنطيرة الشلاكة ودرجة ميولها والزاوية المزبوطة اللي كان ممكن منها تصيب -وكسفة تاج راسهم -مش تفرجت علي جولات الفضائيات على كنادرالناس في الشوارع - والسؤال هل اللي صار مبرر واللا قلة ادب؟ - عااالم علي حافة -الصقع في كل مكان - تصب امية ساخنة علي باب السيارة بيش يفتح وعلى القزاز بيش تذوب القزاز المائي اللي فوقه - تفكر في حاجات واجدة - ف اللي قالت لك كنك معادش ادز في ترجمات - بيش تجاوب بالله! -شن تقول! - تشكرها وهي اللي قلمها بلكي الاقوى توا مع التمرين تكون احسنهن - مش اول مرة هذا رايك - كان ديما من اول تابعته وهي جديدة - تتمنالها التوفيق - تخطر عليك راماشا - مش دزتلك مراسلتها الاسبوعية عالعجاج - قديش دمها خفيف وقلمها ممتع عالاخر - تراجي في ايميلاتها بالساعة والدقيقة - تعيشك غادي - تنقلك في بساط الايميل غاااااادي - وانت هناااااا بعيد - وقريب مرات- سلم الماسنجر صوت وصورة - يالولاه تقول - مش تاني يوم العيد هدرزت مع هلك كانك مقمعز معاهم ف الجنان - مغير ناقص بس بنة الشواية وبنة الياسمين ومسك الليل وتحميضة العيال من الجري واللهيد - امتا يديروا ماسنجر صوت وصورة وبنة ؟ - تهرب من الفكرة - سلبياتها اكثر من ايجابياتها - تقول في سرك ياعون - وترد للبلكونة - اتلمس تربة القراريش - طوبة تلج - اتلمس خشمك - مافيييش - على قول حسونة وهو يعايب على جته الحاجة- مفيش خشم - يبس - هابة توا تخش ويبدا ياكل - نقة - تجيب صوارتك وتلقط شوية صور للهوا المجمد عالشجر وعلي دربزان البلكونة اللي تطل عل النهير المهجور - هجن اللي كانن فيه واللا انظر وين كرسن ؟- توقع اسمك عالتلج - تكتب السبيلنغ غلط ف الانجليزي - وتخش صبعك ميت - ولما يرد فيه الدم وينشط - تفتح لاب توبك - وتخش البلوق سبوت على نوهمة فيه - تبدا تكتب - تلقى مفيش خير من العامية - مرات تمسح الكبد - ومسحات الكبد كاثرات هالايام - حاجات يصيرن عمرهن ماصارن من قبل - عجب - من امتى هالكلام - جو غريب - عالم غريب - هايج مايج - ويستر الله - ياواقي - تقول وتقلب الصفحة - خليك ف التلج والجمود - خيرلك - تزرق الشمس - تفرح - توا يذوب الجليد - ويخف عالنباتات - بس لعند امتى يتحملن يجمدن طول الليل - ويسخنن طول الصبح !- ماهوش حقل تجارب - ماهوش تعذيب - لازم من حل الهن - لازم - كلمة لازم خطرت عليك الفونشة واغنية الملازم - مانك عارف تضحك واللا تبكي - حد الصبر مايع - وحد الشوق فوق الحد - وينك تقول في سرك ياخديجة انت والقزن متاعك - قطعتي قلبه باللي كتبتيه في تهالة عالقزن - مازلتي جرحك ما يطيب - جرحك ماكن هذا هو وبس - - تخش تقلب المحطات وتشوف اخبار الجمود - تاريته اللي عندك صاح ماهو شي حذا عرب ولايات الشمال والشرق- الدنيا بياض عندهم وما ظني اللا دمهم تما جولاطي - حتى لاس فيغاس - ياناس! - اللي ف الصحرا مغطيها التلج !- تي شنو صاير؟- حاسس اللحظة كانك عايم في سيل كلام وافكار متشبكة متلخبصة - كأن الخيوط متلامسات جوا - كأنك تخترف في حلم - تطلع من حفرة اطيح في حالق - ياساتر - شنو قصة الاحلام والتختريف اللي نازلات عليك - اشر من نزلة التلج عالوريدات الموريات والحلويات - قلبة المحراث فاتت من زمان - ومانك عارف تفسر الحلم بالصاح واللا بالعكس - وتفسر ايش وتسيب ايش زعمك؟ - خلاص علي هالتدوينة المشقعبة كيف هالدنيا المايجة - والعام قريب يكمل - والضوايا والزينة اللي تهبل برة ف الشوارع - والتسوق - والتخفيظات - ما كأن الاقتصاد قاعد يدعدع عالحافة - والاسهم كل يوم عن يوم واخذات صالتو ف الغريق - والاعلانات عن سلاسل المحلات والشركات المفلسة - والعائلات اللي يبيعن ف حواشينهن بحق التراب - بيش يغطو مصاريف علاج او عملية - بالغلا والكوا - والتلج مغطيها كلها عالاخر - وهما يبوه - التلج - عشان بابا نويل يقدر يطير كويس - يجيب الهدايا - ويفرحهم - بلكي شوية - بالك تفرج كان عليهم واللا علينا - ماهي كلها عالقة في بعضها - قلوباليزم وتاثيراتها - عولمة يعني - عمايل سودة وتاثيراتها - لعب عيال وتمشكاي خايب - يالله الستر والسلامة - يالله وشوية دفا - يالله ويصفى بحر2009 نين فيه اليبرة اتوق

5 comments:

Anonymous said...

العزيزة لوليتا ..البرد ربما ارحم من العجاج ، والله راحت حالتنا بالويل من تساقط الاحمر ، وفى حالات اخرى نقول ان العجاج اهون من الصقع ، يلى يفرى فى العظم ،زى ما كان يحصل معايا لما نضطر ننحشر فى بيت ريفى معلق على حافة جرف جبلى يطل على كيرينى ، فى عزالشتاء خلال شهر ديسمبر ويناير وفبراير ، والله مرات نقعد نخمم فى الموضوع من قبل ما نمشى لغادى، ما ينفع لا تدفئة ،ولا حتى اكوام من الاغطية الصوفية او حتى طبقات الثياب السميكة ، المهم يالوليتا أنشالله تدفىء بمشاعر بأسامتك ،وأسرتك الجديدة،ومحبيك فى بلاد العجاج والقبلى ..كل سنة وانت طيبة لقرب حلول عام جديد ،متمنية لك افضل الامنيات ..(تدوينة حلوة فى يوم ميلادى ،أضحكتنى )ايناس

naohama said...

كل سنة وانت طيبة اينااااااس
انشالله العمر كله
تعرفي عجبني موضوعك عن السيدة زعيمة الباروني في ليبيا جيل
خليك كملي هالانجاه التوثيقي التعريفي بالرموز المضيئة غي ليبيا
افتحي ايميلك

ابوليلى said...

موضوع طريف وعميق وسهل ممتنع..ومم تشكو العامية؟؟من قال انها ليست من الفصحى..كثير من المفردات وجدتها في القاموس اصلها فصيح مع بعض التحريف البسيط..وصف حكائي رائع ووممتع يا استاذه..وبمناسبة المكانس ..هناك مكانس من نوع آخر توسعت وبدأت تنمو وتفرع كثير من المريدين على شاكلتها..انه زمن المكانس بلاشك..خاصة في وقت الجليد والبرودة؟؟دمت بخير واسرتك ايضا الجميلة.

g.k said...

آه يا لول ويش صاير فيك يانا عليا وعلىك في الصقع والثلج

الحمد لله ياربي إني في ليبيا على قولة وحدة خشت تلقح غادي عند وحدة بلدياته والله مافيه خير من بلادي لو حتى نموت فيها جوع لو جي الصصقع يدفيني حب ليبيا لو جي العجاج والتراب نتفكر المكانس السمحات ونقول لك الحمد والشكر احسن من كل واحد زي الفكرونة مدكوك في حوشه من الصقع

واللي يدفي الجو ويخليه يهبل خشت الخال والخالة والعمة وصغار الخو والجد وأولاد الخال والعلاقات العائلية وقلوبنا الليبين اللي رايحين زي طروف الكلينكس رقاق على بعضنا تشوفي بسمة جراك تضحكي يسمعوك ولعتي السيارة ومبت تولع يجوك يجروا كنك لاباس شنو فيه يحسو بيك مريضة يجن الصبايا يخففن من همك ومرضك آه ياليلي فقدتي حاجات واجدة هانيي ميعوضها لاغزلان ولا سنجاب ولاشي والله دمعتي نزلت وأنتي تحكي على الصقع شنو مداير فيك

والله نهاية السنة هادي حاستها بتجي مش عادية
وخصوصافيه ناس حامقة واجدة من الشلاكة خصوصا اللي قاعدين هنا وهما من غادي صارتلهم ازمات نفسية وقاعدين يدورو في طبيب نفسي ونحنا طبنا هلنا وناسنا ودينا وصلاتنا
ومولية ياصقعونية وعندي تعليق مازال

ونقوولك والله التدوين بالليبي يجنن

وسلامات لول

Anonymous said...

هاي نوهمة

انديروا شوية "اب ديت" للوضع الجوي عندنا. الحمد لله معدش في سيرة للعجاج، على الاقل هنا في طرابلس، و يقولولي الجماعة انه حتى في بنغازي الدنيا عمبتشتي -دوريها شن الكلمة هذي عد- لكن طبعا انت تحكي على نوع آخر من الشتا. عارف انا شن تبيلك، امغير قولي، توا اندزلك سحلب بال"فيد اكس" كان ما فلسوش حتى هما. المهم انحب انتمنالك "نيوو يير" سعيد، و نقولك راهو غير عطيها كم... شهر و حتاخذي على الجو، و يسيرلك "ادابتايشون" للسقع. خطرها راهو في جو قلق ساير للاتصالات الدولية كان ما حدش قاللك. مش عارف حاجة على كابل مقطوع في منطقة البحر الابيض المتوسط، فالتلفونات شبه مستحيلة و النت اللي مفروض اي دي اس ال قعد زي الدايل اب متاع زمان. المهم بلكي كم يوم و يصلح. انشوفوك يا اختي العزيزة و انت في افضل حال، و سلميلي على الاسرة و القراريش و السناجب و الغزلان
ولد الحجاج